2026-yil sentabrida Oʻzbekiston yoqilgʻi quyish shoxobchalarida tushumning 91,9 foizi bank kartalari orqali toʻlandi — avgustda bu koʻrsatkich 91,2 foiz edi.
Oʻzbekiston Markaziy banki maʼlumotlariga koʻra, sentabrda yoqilgʻi quyish shoxobchalarida 3,78 trln soʻmlik 18,5 mln tranzaksiya oʻtdi. Shoxobchalar kuniga oʻrtacha 125,9 mlrd soʻm qabul qilgan boʻlib, shundan 91,9 foizi (115,7 mlrd) — bank kartalari, 5,7 foizi (7,2 mlrd) — “Moment” kartalari, 2,4 foizi (3 mlrd) — yoqilgʻi kartalari orqali toʻlangan. Avgustda bank kartalari orqali toʻlovlar ulushi 91,2 foizni tashkil etgan edi.
2026-yil 1-apreldan Oʻzbekistonda yoqilgʻi quyish va quvvatlash stansiyalarida toʻlovlar majburiy tartibda naqd pulsiz shaklga oʻtkazildi. Davlat 2030-yilga borib mamlakatda naqd pulsiz toʻlovlar ulushini 75 foizga yetkazish vazifasini qoʻygan.