Oʻzbekiston Depozitlarni kafolatlash agentligi faoliyati toʻxtatilgan “Yangi bank” AJ omonatchilariga 207,5 mlrd soʻm miqdorida kompensatsiya toʻlashni yakunladi, deb xabar berdi agentlik direktori Ulugʻbek Xamdamov 21-oktabrdagi mediabrifingda.
Bank yopilganidan keyingi 11 ish kuni ichida omonatchilarning 86 foizi kompensatsiya oldi. Agentlik toʻlovlarni amalga oshirish uchun “Biznesni rivojlantirish banki” AJni agent-bank etib tayinladi. Agentlik maʼlumotlariga koʻra, agent-bank omonatchilarning 99,4 foiziga kompensatsiyalarni toʻlab bergan.
Agentlik tomonidan oʻtkazilgan mablagʻlarning qariyb 1,5 mlrd soʻm miqdoridagi qoldigʻi omonatchilar tomonidan talab qilib olinmadi. Bankni yopishga tayyorgarlik koʻrish jarayonida agentlik kompensatsiya toʻlovlari uchun 250 mlrd soʻm zaxira qilgan edi. Omonatchilarga bitta bankdagi 200 mln soʻmgacha boʻlgan depozitlarni qaytarish kafolatlanadi.