Oʻzbekiston Markaziy banki kreditlar reklamasi va shartnomalarni rasmiylashtirish boʻyicha yangi talablarni tasdiqladi. Qaror 30-sentabr kuni Adliya vazirligida roʻyxatdan oʻtkazildi va Spot.uz yozishicha, 2026-yil 1-noyabrdan kuchga kiradi.
Xatarlarni oshkor qilishning yangi standartlari
Noyabr oyidan boshlab banklar, nobank kredit tashkilotlari va kredit byurolari qarz oluvchilar bilan muloqot formatini oʻzgartirishi shart. Bosma va elektron vizual reklamada yuzaga kelishi mumkin boʻlgan moliyaviy xatarlar haqidagi ogohlantirish endi maydonning kamida 10 foizini egallashi kerak. Audio va videoroliklarda buning uchun xronometrajning tegishli qismi ajratiladi.
Kredit shartnomasida ogohlantirish bloki birinchi sahifada, asosiy matndan oldin joylashtirilishi kerak. U sahifa maydonining kamida 30 foizini egallashi lozim. Agar matnning toʻliq maʼnosi saqlanib qolsa, infografikadan foydalanishga ruxsat etiladi.
Ogohlantirishning oʻzida kreditorlar kechiktirishning aniq oqibatlarini sanab oʻtishlari shart: qarzning koʻpayishi, majburiy undirish, hisobraqamlarni xatlash, mol-mulkni musodara qilish, Oʻzbekistondan chiqishni taqiqlash va kredit tarixining yomonlashishi.
Chalgʻitganlik uchun sanksiyalar
Shu bilan birga, Markaziy bank bozor ishtirokchilariga nisbatan sanksiyalar qoʻllash asoslari roʻyxatini kengaytirdi. Endi regulyator moliya tashkilotining kredit mahsulotini isteʼmolchini chalgʻituvchi deb topsa, uni jazolashi mumkin.
Oʻzbekiston Markaziy banki xabardor qilish masʼuliyatini kreditorlar zimmasiga yuklamoqda: endi salbiy ssenariy hujjatlarni imzolash bosqichigacha mijozga aniq boʻlishi kerak.