inbusiness.kz maʼlumotlariga koʻra, Qozogʻiston Milliy banki ilk bor raqamli moliyaviy aktivlar emitenti sifatida ishtirok etib, Qozogʻiston fond birjasi platformasida qisqa muddatli notalarni tokenlashtirilgan shaklda joylashtirdi.
Auksion 9-noyabr kuni boʻlib oʻtdi. Investorlarga 50 mlrd tengelik qimmatli qogʻozlar taklif qilindi, shundan 10 mlrd tengesi tokenlashtirilgan notalar hissasiga toʻgʻri keldi. Oʻrtacha tortilgan daromadlilik yillik 15,72% ni tashkil etdi. Notalarning muomala muddati — 91 kun, hisob-kitoblar va muomalaning boshlanishi 11-noyabrga belgilangan.
Joylashtirishning oʻziga xosligi shundaki, bitta chiqarilishdagi notalar investorlarga bir vaqtning oʻzida ikki formatda — anʼanaviy va tokenlashtirilgan shaklda taklif etildi. Auksiondagi umumiy talab 70,2 mlrd tengeni tashkil etib, taklif qilingan hajmdan 1,4 baravar oshdi. Kliring va hisob-kitoblarni KASE Kliring markazi amalga oshiradi, egalik huquqlari KASE platformasida hisobga olinadi hamda Qimmatli qogʻozlar markaziy depozitariysining reyestrlar tizimida aks ettiriladi.