Qozogʻiston Milliy banki koʻp bosqichli firibgarlik sxemasi haqida ogohlantirdi: unda tajovuzkorlar davlat xizmatlari yoki banklar nomidan raqamli ishonchnoma yoxud kredit rasmiylashtirilgani toʻgʻrisida xabarlar yuborib, xavotir uygʻotishga va fuqaroni koʻrsatilgan raqamga qoʻngʻiroq qilishga undaydi.
Suhbat davomida firibgarlar oʻzlarini Milliy bank, davlat yoki huquq-tartibot organlari xodimlari deb tanishtiradilar hamda fuqaro nomidan noqonuniy xatti-harakatlar sodir etilayotganini — kreditlar rasmiylashtirilayotgani, kompaniyalar roʻyxatdan oʻtkazilayotgani yoki shubhali moliyaviy operatsiyalar oʻtkazilayotganini maʼlum qiladilar.
Bunday harakatlarning oldini olish bahonasida jinoyatchilar shaxsni SMS orqali kelgan kodlarni aytishga, bank kartasi rekvizitlarini berishga, mobil ilova oʻrnatishga, pullarni «xavfsiz hisob»ga oʻtkazishga yoki qurilmaga masofaviy kirish huquqini taqdim etishga koʻndiradilar.
Milliy bank oʻz xodimlari karta maʼlumotlari, SMS-kodlar, PIN-kodlarni soʻramasligini, xavfsiz hisoblarga pul oʻtkazishni taklif qilmasligini hamda audio va videoqoʻngʻiroqlar amalga oshirmasligini eslatib oʻtdi. Shubhali xabarlar olingan taqdirda bank yoki davlat xizmatining rasmiy aloqa markaziga, firibgarlikka duch kelganda esa huquq-tartibot organlariga murojaat qilish tavsiya etiladi.