Moody’s Ratings agentligi Qozogʻistonning Freedom Life hayotni sugʻurtalash kompaniyasiga barqaror prognoz bilan Baa3 moliyaviy barqarorlik reytingini berdi — bu sugʻurtalovchining ilk investitsiya reytingidir.
Baa3 reytingi kompaniyaning S&P Global Ratings tomonidan berilgan amaldagi reytingidan (BB+) yuqori boʻlib, S&P va Fitch shkalalari boʻyicha BBB- darajasiga toʻgʻri keladi. Moody’s Freedom Life 2025-yilda mukofotlar hajmi boʻyicha qariyb 20% ulush bilan Qozogʻiston hayotni sugʻurtalash bozorida uchinchi oʻrinni egallab turganini hamda uning kapital pozitsiyasi mustahkamlanganini qayd etdi: xususiy kapitalning jami aktivlarga nisbati 2024-yildagi 24% dan 2025-yilda 30% gacha oshgan. Kompaniyaning 2025-yildagi sof foydasi 36% ga oʻsib, 12,5 mlrd tengedan 17 mlrd tengegacha yetdi.
