Oʻzbekiston Ichki ishlar vazirligi hamda Bosh prokuratura huzuridagi Iqtisodiy jinoyatlarga qarshi kurashish departamenti kripto-aktivlar aylanmasi sohasida faoliyat yurituvchi shaxslar uchun ichki nazorat qoidalariga oʻzgartirishlar kiritdi.
Oʻzgartirishlar davlat reyestridan oʻtkazilib, 2026-yil 28-sentabrda rasmiy eʼlon qilingan paytdan boshlab kuchga kiradi.
Yangilangan qoidalar xizmat koʻrsatuvchilarda ichki nazorat tizimini takomillashtirish, mijozlarni tekshirish va shubhali operatsiyalar toʻgʻrisida xabarlar yuborish talablariga aniqlik kiritish, shuningdek, ichki nazorat samaradorligini monitoring qilish tartib-taomillarini yaxshilash va atamalarni amaldagi qonunchilikka muvofiqlashtirishni nazarda tutadi.
Oʻzgartirishlar jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurollarini tarqatishga qarshi kurashish tizimini mustahkamlash, FATF xalqaro standartlarini joriy etish hamda xizmatlardan noqonuniy faoliyatda foydalanish xavflarini kamaytirishga qaratilgan.