inbusiness.kz maʼlumotlariga koʻra, Qozogʻistonning ForteBank banki biznes uchun ForteBusiness internet-bankingida raqamli tenge bilan operatsiyalarni amalga oshirish imkoniyatini taqdim etdi.
Xizmatda raqamli tengeda hisob ochish, balans va koʻchirmalarni koʻrish, mablagʻlarni konvertatsiya qilish hamda QQSli toʻlovlarni amalga oshirish mumkin. Xizmatlarning toʻliq spektri bank boʻlimlarida ham mavjud boʻlib qoladi.
ForteBusiness’da QQSli toʻlovlar uchun elektron hisob-fakturalarni toʻlash va raqamli tengeda e-Shartnoma doirasidagi toʻlovlar mavjud. Xizmat «Raqamli QQS» pilot loyihasi ishtirokchilari, davlat xaridlari qatnashchilari, maqsadli moliyalashtirish oluvchilar hamda davlat dasturlari doirasida imtiyozli kredit oluvchi kompaniyalarga moʻljallangan. «Raqamli QQS» loyihasi ishtirokchilari shartlarga rioya qilingan taqdirda QQSni tezlashtirilgan tartibda — 15 ish kunigacha boʻlgan muddatda qaytarib olishlari mumkin.
Raqamli hisobni fortebusiness.forte.kz saytidagi ForteBusiness internet-bankingida yoki bank boʻlimlarida ochish mumkin.
