eMaktab milliy raqamli taʼlim platformasi Uzum Bank bilan birgalikda Oʻzbekistonda maktab xizmatlari haqini toʻlash uchun onlayn xizmatni ishga tushirdi.
Xizmat 10 900 dan ortiq maktabni birlashtiradi hamda ota-onalarga taʼlim, ovqatlanish, qoʻshimcha darslar va boshqa maktab xizmatlari uchun toʻlovlarni eMaktab veb-sayti yoki ilovasi orqali bank kartalari yordamida amalga oshirish imkonini beradi. Taʼlim muassasalari esa moliyaviy hisobni avtomatlashtirish va maʼmuriy yuklamani kamaytirish imkoniyatiga ega boʻladi. Maktablar uchun xizmatga ulanish bepul.
Ota-onalar toʻlovlar holatini kuzatib borishlari, muddatlar haqida eslatmalar olishlari, operatsiyalar tarixi hamda elektron cheklarni koʻrishlari mumkin boʻladi. Birinchi bosqichda xizmat eMaktabʼga ulangan xususiy maktablar uchun amal qiladi. Platforma imkoniyatlar va hamkorlar doirasini bosqichma-bosqich kengaytirishni rejalashtirmoqda.
