Qozogʻistonning Milliy antifrod-markazi 130 mlrd tengelik oʻgʻriliklarning oldini olish va bloklash imkonini berdi. Bu haqda XIV Moliyachilar kongressida Milliy bank raisi Timur Suleymenov maʼlum qildi, deb yozadi Kapital.kz.
Milliy bank rahbari tayangan Bosh prokuratura maʼlumotlariga koʻra, 2026-yilning yanvar–sentabr oylarida mamlakatda moliyaviy firibgarlik hajmi 20 foizdan koʻproqqa qisqargan. Bunday pasayish 2020-yildan beri birinchi marta qayd etildi.
Antifrod-markaz 2024-yil avgust oyidan beri sanoat ekspluatatsiyasida ishlamoqda. Bu banklar, huquq-tartibot idoralari va uyali aloqa operatorlariga real vaqt rejimida maʼlumot almashish hamda shubhali tranzaksiyalarni bloklash imkonini beruvchi raqamli platformadir. Ichki ishlar vazirligi tizimdan murakkab firibgarlik sxemalarini tahlil qilish uchun foydalanadi.
Milliy bankning biometrik identifikatsiyasi qoʻshimcha toʻsiq boʻldi. Timur Suleymenovning soʻzlariga koʻra, hozirda xizmat har kuni taxminan 4 mln operatsiyani qayta ishlab, raqamli moliyaviy xizmatlardan xavfsiz foydalanishni taʼminlamoqda.
Qoʻngʻiroqlarni markalash
Antifrod-markaz ishi bilan parallel ravishda Qozogʻistonda yuridik shaxslardan keladigan qoʻngʻiroqlarni majburiy markalashni joriy etishga tayyorgarlik koʻrilmoqda. Tashabbus jinoyatchilar oʻzlarini bank yoki davlat idoralari xodimlari qilib koʻrsatadigan telefon firibgarliklari sonini kamaytirishi kerak.
Sentabr oyida Telekommunikatsiyalar qoʻmitasi raisi Damir Seysembekov telekom-operatorlar markalashni 2027-yilning birinchi choragidan boshlab joriy etishni taklif qilganini maʼlum qilgan edi; oʻshanda aloqa xizmatlarini koʻrsatish qoidalarini sohaga masʼul vazirlik ishlab chiqayotgan edi.