Mijozlar raqamli aktivlar bilan QR-kod orqali toʻlashlari mumkin, sotuvchilar esa darhol tenge oladilar. Loyiha Milliy bankning tartibga solish qumdonida ishlamoqda.
Alatau City Bank Binance kriptobirjasi bilan hamkorlikda chakana savdo doʻkonlarida tovar va xizmatlar uchun kriptovalyuta bilan toʻlash funksiyasini joriy qildi. Bu haqda Binance asoschisi Chanpen Chjao va birjaning mahalliy boʻlinmasi tasdigʻiga tayanib Kursiv portali xabar berdi.
Nima yuz berdi
Bank oʻzining 5 mingta POS-terminalini Binance Pay platformasiga ulab berdi. Kriptobirjadagi hamyon egalari endi kundalik xaridlar uchun Crypto Pay servisidan foydalanishlari mumkin.
Jarayon biznes uchun odatiy hisob-kitoblarni oʻzgartirmaydigan qilib tuzilgan. QR-kodni skanerlashda xaridor summani kriptovalyutada va joriy ayirboshlash kursini koʻradi. Tranzaksiya tasdiqlangandan soʻng raqamli aktivlar avtomatik ravishda konvertatsiya qilinadi va sotuvchining hisobiga chekda koʻrsatilgan miqdordagi tenge kelib tushadi.
Mamlakat va bozor
Qozogʻiston raqamli aktivlar bilan ishlash uchun qonuniy infratuzilmani izchil barpo etmoqda. Alatau City Bank va Binance loyihasi Milliy bankning tartibga solish qumdoni doirasida amalga oshirilmoqda.
Avvalroq regulyator kriptoindustriyani an’anaviy moliya tizimiga integratsiya qilish boʻyicha tajriba loyihalarini ma’qullagan edi. Ushbu bogʻlamda klassik bank bitimning fiat qismini oʻz zimmasiga oladigan va operatsiyalarning mahalliy qonunchilikka mos kelishini ta’minlaydigan hisob-kitob hamkori sifatida ishtirok etadi.
Nima uchun bu muhim
Savdo nuqtalariga kriptohamyonlar ochish, raqamli aktivlarni tartibga solishni tushunish yoki kurs oʻzgaruvchanligi xavfini oʻz zimmalariga olish kerak emas. Barcha texnik va komplayens-yuklama bank va birja infratuzilmasi tomonida qoladi.
Klassik POS-terminallar negizida kriptotoʻlovlarning ishga tushirilishi raqamli aktivlarni spekulyativ zonadan real chakana aylanmaga oʻtkazadi.
Keyin nima boʻladi
Bozor chakana mijozlar tomonidan ushbu funksiyaga boʻlgan real talabni baholashi kerak. Keyingi qadam Crypto Pay’ni qoʻllab-quvvatlaydigan terminallar tarmogʻini dastlabki 5 mingta qurilmadan tashqariga kengaytirish va tajriba loyihalarining boshqa ishtirokchi banklari tomonidan shunga oʻxshash mahsulotlarning ehtimoliy chiqarilishi boʻladi.
