Qozogʻiston Mehnat va aholini ijtimoiy muhofaza qilish vazirligi 6,2 million oilaning 20 milliondan ortiq aʼzosi maʼlumotlarini tahlil qiluvchi «Otbosining raqamli xaritasi» platformasi orqali davlat xizmatlarini proaktiv tarzda koʻrsatishni kengaytirmoqda.
Tizim SmartData Ukimet axborot-tahlil platformasi negizida ishlaydi va 30 ga yaqin davlat organining axborot tizimlari bilan integratsiyalashgan. Ushbu maʼlumotlar asosida platforma daromad, bandlik, ijtimoiy toʻlovlar, uy-joy sharoitlari, mol-mulk, salomatlik va taʼlimni hisobga olgan holda oilalarning ijtimoiy farovonlik darajasini avtomatik ravishda aniqlaydi.
Davlat koʻmagiga boʻlgan ehtiyojni aniqlash uchun vazirlik BMT Taraqqiyot dasturi bilan birgalikda ishlab chiqilgan aholi farovonligini baholash metodikasidan foydalanadi. Tizim fuqaroning muayyan yordamga boʻlgan huquqini aniqlaganida, unga 1414 raqamidan SMS-xabarnoma yuboriladi va rozilik berilganidan soʻng xizmat avtomatik ravishda rasmiylashtiriladi.
Vazirlik maʼlumotlariga koʻra, fuqarolarning roziligini olish uchun platforma orqali 2 milliondan ortiq SMS-xabarnoma yuborilgan. Proaktiv formatda davlat xizmatlari va toʻlovlar 935 ming nafar fuqaroga tayinlangan. Tizim orqali nafaqalar va ijtimoiy toʻlovlarning 11 ta turi, jumladan, bola tugʻilganda beriladigan toʻlovlar, ish yoki boquvchisini yoʻqotgandagi nafaqalar, nogironlik boʻyicha nafaqalar va koʻp bolali oilalarga beriladigan toʻlovlar mavjud.