RISE Researchʼning «Fintech in Kazakhstan 2026» tadqiqotiga koʻra, Qozogʻiston banklarining toʻrtdan uch qismi kredit skoringi, firibgarlikka qarshi kurashish va marketingda sunʼiy intellektdan foydalanmoqda.
Mahalliy banklarning 75 foizi asosiy biznes yoʻnalishlarida allaqachon sunʼiy intellektni qoʻllamoqda. Mazkur texnologiya tajribalardan kundalik operatsiyalarga oʻtmoqda: agar 2024-yilda 31 ta tashkilot dastlabki tadqiqotlar bosqichida boʻlgan boʻlsa, 2025-yilda ularning soni 22 tagacha kamaydi, pilot loyihalar soni esa 4 tadan 13 tagacha oʻsdi.
Asosiy tendensiya — diqqat markazining mijozlar interfeyslaridan ichki operatsion vazifalarga siljishidir. Sunʼiy intellektni qoʻllashning top-5 yoʻnalishiga operatsion faoliyat (respondentlarning 21 foizi), dasturiy taʼminot ishlab chiqish va axborot tizimlarini qoʻllab-quvvatlash (18 foiz), risklarni boshqarish va komplayens (16 foiz), marketing va savdo (15 foiz) hamda mijozlarni qoʻllab-quvvatlash (14 foiz) kirdi.
