Tojikiston va Yevropa tiklanish va taraqqiyot banki ikkita loyiha — Koʻlob shahrining suv taʼminoti va kanalizatsiyasi hamda Baljuvon — Sari Xosor avtomobil yoʻlini tiklash uchun jami €62,45 mln miqdoridagi kredit va grant bitimlarini imzoladi.
Bitimlar 27-oktabr kuni Moliya vaziri Fayziddin Qahhorzoda va YeTTB vitse-prezidenti Matteo Patrone oʻrtasidagi uchrashuvda imzolandi. Yoʻlni tiklash loyihasiga €52,85 mln yoʻnaltiriladi va u 54,1 km uzunlikdagi uchastkani rekonstruksiya qilish, 10 ta koʻprik qurish hamda 121 ta suv oʻtkazuvchi quvur oʻrnatishni koʻzda tutadi. Koʻlob suv taʼminoti loyihasi esa €9,6 mln oladi va u suv omborlarini qurish va qayta tiklashni, ichimlik suvi sifatini yaxshilashni oʻz ichiga oladi.